Wedding Ring I - Visit to Forever Couple Showroom

初初籌備結婚嘅時候，我同Mr. Ha成日都買wedding magazine，睇吓要做啲咩籌備工夫。有一次睇雜誌時，見到Forever Couple嘅廣告。本來戒子廣告無咩特別，不過我俾佢地嗰款指紋戒子吸引住。我覺得將對方嘅指紋刻咗落去好特別，於是話俾Mr. Ha聽，我想我地嘅結婚戒子特別啲。哈，佢都同意，於是我地好快就決定咗去邊度做結婚戒子。

我地行expo時都有行過去Forever Couple嘅counter睇吓，但係每次都有好多人，同埋想睇嘅款人地睇緊，加上我地又唔係好急（仲有一年幾時間），所以都係問吓啲簡單問題同埋試吓就算。不過，佢地唔係每次會展wedding expo都擺booth，我地本來打算上一次expo搵佢地落order，點知唔見佢地有booth。隨住婚期時間越來越近，我同Mr. Ha索性去佢地showroom。

上到去佢地showroom，有一pair人正在睇緊戒子。我都好直接話俾sales姐姐我地對佢地嘅指紋戒子有興趣。sales姐姐攞咗好多唔同款式、唔同顏色、唔同粗幼、有石無石好多唔同種類嘅戒子俾我地試。我個人唔鍾意一大粒石放喺戒子上面，反而我鍾意啲石鑲喺戒子兩邊，無咁「齋」之餘又可以subtle啲!! 唔講唔知，原來如果鑲石喺戒子兩邊，數量必須係3粒、6粒（唔記得9粒得唔得）。當然鑲鑽要逐粒另計啦!! 不過，好開心，我地可以慢慢試，又無人同我地爭，又可以好悠閒咁問sales姐姐意見。 真係好彩我地有上去showroom一次!!! 絕對好過喺expo睇!!!

試咗咁多隻戒子，我地其實都已經有晒idea要邊一款、咩顏色、要幾多粒石.... 同sales姐姐傾開，知道佢地會喺6月expo擺booth，咁當然問佢訂做戒子要幾耐。如果唔使太耐的話，梗係等到expo先落order啦!! sales姐姐話要個幾月時間做，咁我地等得，一於留返expo，因為可能仲會多啲discount嘛!! 就係咁，我地寫低晒我地嘅要求，同埋攞埋姐姐張咭片，一於磨拳擦掌等6月expo!!