好彩 ..... 真係好彩

在今個月初的時候，我、Mr. Ha和米米他們去了尖東御苑樓下的酒樓，飲親戚嫁女的喜酒。當中發現不少得意的事情。

通常喜筵的第一道菜是乳豬，上菜時發現乳豬的眼閃着心形燈，勁攪笑!!

吃了幾道菜後，大家開始發現每一道菜的碟和盛碟的盤是不match的。碟的形狀有心形、方形等等，無論是什麼形狀，酒樓均一律用圓形的盤盛着，所以玻璃碟總是搖吓搖吓。

另外，我們的玻璃轉盤太實了（可能沒有落潤滑油），所以要花點力才能轉動轉盤。前後有兩次，待應在轉動轉盤時可能太用力，所以不小心將豉油碟之類的醬料小碟「飛出」玻璃，不偏不倚的斜斜地落在我的面前，幸好那些醬料沒有倒在我的身上!!  加上Mr. Ha在開席時不小心倒潟了一點可樂，我坐的位置可算很「旺」，其他坐在同枱的親戚卻沒有遇到這樣的情況，哈哈!! 雖然驚險了三次，但每次也沒有給弄髒，真的很好彩!!

可能自己早前擺過酒，所以特別留意人家的婚宴安排。當自己做賓客時，才發現原來自己已通知主人家自己會出席，但進場時發現guest list沒有自己的名字是會有點不開心的!! 其實這樣除了容易令賓客誤會外（我是否要跟自己的親戚朋友分開坐?? 還是主人家預了我不會來??），還會讓安排座位的兄弟姊妹手忙腳亂。我們是女家父親的親戚，總共12人出席婚宴，但guest list只出現了6個人的名字!! 足足少了一半，所以初時主人家還另外安排了4個人坐在我們那一圍，哈哈!! 後來得知，新人不知道我們每個人的名字，所以就在guest list上省略了..... 要是這些情況在我的婚宴上出現，我一定會很嬲  不過，這是人家的婚宴，只要有位給我坐，我便沒有所謂了。

吃甜品時，不知是那一方的親戚走出來，說主人家要求他們高歌一曲贈慶。哈哈，從未試過在婚宴當中見過有親戚唱歌贈慶，還要是用台語唱的「愛拼才會嬴」!! 那一刻的感覺有點像看「超級巨聲」或是「XX一叮」之類的節目，這個安排真的很特別!! 可能兩個人的婚姻是否長久，需要兩個人同心打拼，才會勝利啩??

無翅的代價

因為負責我們account的勞小姐下星期開始放大假，所以我們昨天下午去御苑找她confirm我們big day當晚的菜式。本來還打算看看新做的backdrop，但勞小姐說下星期才開始做，要8月初才可以看。唉，之前就說7月初，後來又改為8月初......

今次去酒樓，除了confirm菜式外，其實也要confirm和clarify很多東西：

1.       酒席數目、菜式及酒水

由於我們是以包廳形式book維港廳，所以今次擺酒有最低消費。決定要哪一款菜式前，酒樓要知道我們大概有多少圍。如果擺的圍數不多，那麼就要揀比較貴的菜式，為的是要meet最低消費額嘛!! 我和Mr. Ha預算擺33圍，所以就算揀最平的那一款菜式也已經過了最低消費額。由於時間尚早，未知確實出席飲宴的人數，所以酒樓預算我們的圍數是33圍（±2圍），即最起碼要擺31圍。如果圍數不在33±2這個range之內，要14日前通知酒樓。

2.       翅?? 唔翅??

現在漸漸流行無翅婚宴，很多朋友知道我們擺酒後，第一時間便問會否食翅。雖然可能他們是隨口問，但可見大家開始漸漸有這個意識。之前徵詢了幾位話事人的意見，大家都覺得無翅酒席無問題，於是問勞小姐拿了一張無翅酒席的菜單。已經忘記當中包括什麼菜式，只記得Mr. Ha的媽媽曾經說過很普通（不夠體面??），不過價錢跟有翅酒席最平的那一款差不多。可能見我們有些猶豫，勞小姐建議我們保留原有的菜式，但可考慮將魚翅改為燕窩或是花膠鮑參。天下間無免費午餐，轉燕窩或鮑參當然每圍要另加錢啦!!! 真的替鯊魚不值，燕子口水比牠們寶貴的魚鰭還要貴!!! 一日燕子健在，口水還可繼續提供；但鯊魚沒有魚鰭就會死，何來還有魚鰭給我們做魚翅?? 最後，我們決定要燕子口水，於是「竹笙雞絲翅」就改為「鳳汁海皇燴燕窩」。

3.       齋菜安排

由於米米食齋，而她當日亦會邀請同一佛堂的師姐們出席，所以之前亦曾問過有關齋菜的安排。如果我們有賓客要吃齋的話，酒樓會另外準備素菜給那一位賓客，而那賓客所坐的那一圍的食物不會pro-rata減少（梗係啦，收咗我們一圍酒席嘅價錢喎!!），因此坐在同枱的其他人就可以吃多些了。當然啦，另備素菜又要加錢啦!! 酒樓有兩款素菜菜單提供，有平有貴，米米看過兩個菜單後，揀了較貴的那款（體面啲嘛!!）。由於米米、姨媽和六姨食齋，所以女主家席要另備三人素菜；而男家又有幾位親戚食齋。

其實，以米米所知，她的師姐們很賞面出席，粗略估計也有6人。如果她們只得6個的話，那麼其餘被安排在同一圍的6個人就要食double份量的東西??!! 點食呀??  既然無可能要師姐們分開坐，我索性安排一圍全素菜，若米米的師姐們未能坐滿一圍，我唯有叫兄弟姊妹坐在那圍填數。為此，勞小姐另外給我們一圍齋菜的菜單，價錢跟我們揀的酒席一樣。這樣最好啦，無論食肉還是食齋，大家也是吃一樣價錢的東西，無謂給人多說話。回家後讓米米看過素菜的菜單，幸好她說菜式不錯。

4.       證婚座位安排

之前問勞小姐證婚枱會和座位如何放置，她說要由律師決定，因為有些律師有指定的擺法。上次趁去Mr. Ha的律師friend的office簽文件，問問律師friend有沒有指定擺法。他說他反而會按客人要求，不過他說證婚枱的座位一般有兩個擺法：

選擇哪個擺法取決於證婚枱的大小，如果證婚枱不夠大，就一定不可以新人和證婚人坐在同一邊。勞小姐說酒樓的證婚枱有2呎 x 6呎，如果要4個人坐在同一邊的話無問題，不過可能會迫一些。Mr. Ha覺得4個人坐在一起好像開記招，所以打算證婚人坐在側邊，律師就站着為我們進行宣誓儀式，預算60位親戚朋友出席證婚儀式。不過，勞小姐說big day當天見到律師時，會再confirm多一次證婚枱的安排。

5.       交場時間

因為我們約在5時多證婚，所以要酒樓早些交場。勞小姐仍是那一句：「你地想我地幾點交場，就嗰個時候交。」她最後在memo上寫4:30p.m.交場。因為兄弟姊妹可能會在酒樓午飯，然後便會開始準備晚上的banquet，所以我想可以再早些。勞小姐好肯定話，其實他們約兩、三點已經開始執場，所以兄弟姊妹午飯後要準備的話也無問題。

6.       餐酒

酒樓會每2圍提供1支紅酒/白酒，亦可提供VSOP。Mr. Ha說有些親戚朋友喜歡喝酒，所以要預備一些VSOP。我自己那邊的親戚朋友沒有一個飲這麼烈的酒，所以可以不用預太多VSOP，剩下的quota就要紅酒。雖然如此，酒樓提供的紅酒數量可能不夠，所以要另外再訂一些紅酒。跟勞小姐說好，那些另訂的紅酒可於big day一日前送到酒樓。

7.       回門乳豬

有些人想方便些，會於big day當日回門，但我們不想這麼趕，所以big day之後那天才回門。勞小姐還問我們什麼時候到取回門乳豬，既然我們big day之後不用去還衫（因為Janny於當晚會到酒樓取回晚裝），所以11:00a.m.才到黃大仙御苑拿回門乳豬。

8.       宴會音樂

問了勞小姐，如果歌曲由我們自己提供的話，file format可以是mp3，不過最好就是所有歌燒在一隻CD。看了酒樓的揀歌紙，有好多都不是我們的那杯茶。我已和Mr. Ha說好，給大家兩個星期時間揀歌。不過，勞小姐提醒我們要預留時間試play隻CD，要是有問題的話，可以再燒過嘛!!

9.       出門酒店

酒店套房已confirm，勞小姐說不用hotel voucher，用我的身分證check in便可。問了勞小姐酒店check-in時間，我想late check-out，勞小姐說要到時跟酒店講，看看能否late check-out。

除了以上的item外，我們還confirm很多miscellaneous items，想不到這樣又用了1個多小時

「酒席花」?

今日睇報紙，睇到一個名詞「酒席花」? 第一個反應係：咩o黎o架? 哦，原來係預售酒席

慶幸這些事不是發生在自己身上，作為準新人，我都好明白新娘子的感受，除咗好嬲，都仍然係好嬲囉!! 唔睇相都好難相信條柱會有半張枱咁大!! 真係要小心啲，千祈唔好因為discount，就好咁倉促做決定!!

資料來源：蘋果日報

 

專題報導：結婚「酒席花」搵笨

2010年03月18日

 

買樓有樓花，婚宴時興「酒席花」。中國人結婚，擺酒大過天，為競逐好日子，不少準新人在婚期前兩年已預訂酒席，即使酒樓未開業，也甘願博一鋪。消費者委員會過去兩年開始收到酒席花投訴，有設計圖與現實差天共地，準新人付出數萬元定金，結果換來一肚氣，幾乎連婚宴也要取消。
記者：張嘉雯

 

個案一

Elaine：帝廷皇宮唔對辦
08年 10月， Elaine預訂了皇上皇集團旗下、位於尖沙嘴中港城的帝廷皇宮，原定去年 11月設宴，後來因婚宴改期，在集團職員介紹下，轉到當時尚未開業的九龍灣皇廷酒家，合共繳付 3,000元轉場及轉日子費用。「張設計圖真係整到勁靚，但去到睇完全兩回事，話擺到 30圍，根本冇可能。我好唔滿意，佢叫我轉去合和間帝廷皇宮，又話個裝修同中港城嗰間一樣，我當時唔係好想轉，因為九龍灣咁樣我已經好驚，但係佢實牙實齒話一樣，我惟有信佢。」
去年 9月，灣仔場開業， Elaine再一次大受打擊。「我當場喊咗出嚟，中港城嗰間係啡色，灣仔呢間係黃色，好娘好肉酸，中港城嗰邊牆上有壁畫，呢度牆上面有好多畫框，但入面冇畫。我同佢拗數，佢唔認有講過兩個場裝修一樣。」幾經辛苦取回模擬圖金，但轉場費就無法追討。「冇諗到佢會咁呃人，你唔係咪唔係囉，做乜講大話！講完又唔認，同佢哋講嘢真係要錄音，仲晦氣話，『你唔滿意咪告我囉』，跟住 cup我線。」

《灣仔帝廷皇宮模擬圖》

《灣仔帝廷皇宮實景》

個案二

Pauline： 8度海逸酒店多柱
去年 5月， Pauline在婚紗展中發現土瓜灣 8度海逸酒店，前後繳付共 34,000元定金，計劃今年 10月設宴，酒店去年 10月開幕，「我哋自己走上去睇，見到真係嚇咗一跳，落定嘅時候佢個 floorplan有 4個柱位，個 sales話條柱好細，得四格階磚咁大，點知出到嚟變咗 7條柱，全部半張枱咁大。」
該場地聲稱可擺放 25圍，但過半人將看不到主禮台，「咁多柱，我 march-in都唔得啦，成晚同啲客人捉兒人咩！」
「我家結婚都唔敢通知朋友，唔係叫咗佢哋嚟都唔知有冇位坐，想喺李嘉誠手上攞番啲嘢唔係咁易，就算佢肯退番定畀我都冇用，我都搵唔到第二個地方擺。」她本計劃在同一場地邀請律師證婚，「喺嗰度宣誓真係過唔到自己嗰關，惟有額外畀多啲錢，搵過個證婚場。」

《 8度海逸酒店模擬圖》

《 8度海逸酒店實景》

個案三

Flora：見啲圖好靚中招
Flora兩個月後結婚，去年 8月在婚紗展中預訂 8度海逸酒店，計劃設宴 12圍，前後繳付了 21,000元定金，「我見佢啲圖好靚，但係仲有猶豫，個 sales同我講，『你唔信我都信海逸個名吖！』我諗住會冇事，佢嗰時仲同我講佢嗰度樓底高。」
結果 8度海逸酒店開業，令她大失所望，「我同佢講佢哋樓底矮冇 11呎 2，個經理話拆咗個天花板就有 o架喇，話真係有 11呎 o架，我話我個 MC（司儀） 6呎幾，企上個台咪頂頭，佢反問我『為乜搵個咁高嘅 MC？』」背景板亦由合約列明的 20呎乘 8呎，縮小至 12呎乘 7呎。
酒店最初答應退款，後來反口，經消委會協助，可取回部份定金。
本報記者向兩間涉事酒店、酒樓查詢，至截稿前未有回覆。

三宗投訴個案

投訴人： Elaine　集團：皇上皇集團　場地：九龍灣皇廷酒家、灣仔帝廷皇宮
不滿：兩度轉場，酒家的裝修設計均與原來的電腦模擬圖及平面圖不同，誇大可容納圍數

投訴人： Flora　集團：海逸國際酒店集團　場地： 8度海逸酒店
不滿：樓底矮、禮台窄，與合約內容不符，酒店態度惡劣

投訴人： Pauline　集團：海逸國際酒店集團　場地： 8度海逸酒店
不滿：柱位重重，不能移動的柱位由四條增至七條，新人難以進場

資料來源：投訴人

 

去婚紗展勿倉卒落定

一連三日的婚紗展明日開鑼，有婚禮顧問提醒新人切忌衝動作決定，因為婚紗展內「群情洶湧」，若事前資料搜集不足，倉卒落定，結果可能後悔莫及。顧問教路，婚紗展入場券三天有效，準新人首天進場了解情況後，宜先與伴侶及家人商量，翌日才再次進場落定，可以減少花寃枉錢的風險。
去年有寓意「長長久久」的 2009年 9月 9日，今年有媲美「十全十美」的 2010年 10月 10日，政府統計處的數字顯示，本港每年登記結婚人數 4萬多人，去年逾 4.9萬人登記，較 08年增加 4.2%。

勿單人匹馬進場

婚禮顧問歐惠芳指，準新人喜歡婚紗展商舖集中，優惠亦較多，但若定力不足，隨時得不償失，「我建議啲準新人，婚期前半年到一年就好去婚紗展，婚紗展通常有三日，張飛三日都用得，第一日可以睇吓先，第二、三日先落定。」她不建議新人「單人匹馬」進場，「可以同父母、結咗婚嘅朋友去，畀啲意見，唔好咁快落定，盞嘥啲寃枉錢。」
對於準新人「買酒席花」事後發現貨不對辦，律師梁永鏗認為，酒店或酒家錯誤引導消費者簽訂合約，消費者可以要求退款或賠償，「只要攞住當時嘅圖片、宣傳單張，就可以追討，不過賠償好難計，要求佢還原番，畀番完全一樣嘅場你，唔通佢裝修過間嘢咩，要求退款就易啲。」若有證據指酒樓裝修時已經沒有計劃提供模擬圖中的設計，更可列作訛騙處理。

應保留圖文資料

他提醒消費者，應要求酒家在合約上寫清楚現場環境以模擬圖為準，若貨不對辦有權退款，付款後亦應定期視察裝修情況。
消委會總幹事劉燕卿強調，酒席資料的準確性非常重要，「貨不對辦係唔啱嘅，咁樣做等同誤導人，結婚係人生大事，你 sell嘅時候 sell呢個期望畀人，到時你提供唔到就係有問題，消費者就有權追討。」她直言不鼓勵巿民買酒席花，即使選擇了，亦應保留酒樓的平面圖及圖片，方便日後參考。
歐惠芳建議，即使買酒席花，時間亦要鬆動，「至少預三個月時間職員同埋廚房操熟啲。」

預訂酒席小提示

•婚紗展入場券三天有效，準新人首天不宜落定，與家人商量後再作決定
•若預訂酒席花，應保留酒店或酒家銷售時提供的圖片及宣傳單張
•若酒樓只用電腦展示照片，準新人可以手機或相機拍下相片
•若預訂酒席花，應要求酒家在合約上寫清楚現場環境以模擬圖為準，若貨不對辦有權退款
•預訂酒席花，付款後應定期視察裝修情況
•即使買酒席花，應預三個月時間緩衝期，以免酒樓未取得牌照，或職員不熟悉運作而受影響

資料來源：消委會總幹事劉燕卿、律師梁永鏗、婚禮顧問歐惠芳

Venue for Wedding Banquet III

終於轉入直路，我同Mr. Ha去御苑俾deposit，hold住2010年9月25日維港宴會一、二廳!!!

負責我地account嘅勞小姐仲話，會將洗手間對出的位置給我們做麻雀耍樂區。因為我地要晒整個維港宴會廳，所以我地會有兩間新娘房。勞小姐建議一間新娘房留俾我用，另一間則可俾男家用。適逢Mr. Ma的妹妹剛有了BB，到時可有一間房給她休息，真好!!

唔係Mr. Ha講俾我知，我都無留意，原來御苑皇宴有Facebook喎!! Facebook嘅威力真係無遠弗屆!!

http://www.facebook.com/pages/xiang-gang/yu-yuan-huang-yan-The-Banqueting-House/78292223042

Venue for Wedding Banquet II

除咗喺邊度擺酒外，另一個問題就係喺邊一日擺酒呢?  Mr. Ha的爸媽沒有所謂，但我的米米就有要求了。我都明白她是為我地好，希望我地喺一個好日子結婚。由於還未出2010年的通勝，所以只可以靠網上的電子通勝搵好日子。搵了好幾個日子後，又要睇吓會唔會撞生日（包括Mr. Ha的爸媽、米米、我和Mr. Ha、二三小姐、四少） 咁搞法都好難結到婚啦 其實，米米自己都唔係好識擇日。Mr. Ha諗咗一個折衷嘅方法：就係搵師傅擇日嘞!!

講俾米米聽呢個方法，佢都覺得幾好，不過好快就問：個師傅得唔得o架? 當然無問題啦，因為Mr. Ha妹妹的老細搵呢位師傅睇風水睇咗好耐，幫襯咗咁多年都應該無問題啦!!

既然話事人無異議，Mr. Ha就迅速行動，將我地兩個嘅時辰俾師傅擇日。由於我地想喺御苑皇宴擺，所以我地要再去多一次御苑，問勞小姐2010年仲有咩星期六、日嘅空檔，然後交俾師傅擇日。師傅都好快send email通知我地，佢幫我地擇咗2010年9月25日擺酒。好嘢，距離我地訂酒席呢項偉大工程又邁進一大步了

Venue for Wedding Banquet I

決定咗結婚後，我同Mr. Ha就加入咗去wedding expo嘅行列。第一次去wedding expo，感覺好新奇其實有呢啲expo幾好，因為可以一次過攞到好多酒樓嘅資料。由於Mr. Ha的爸爸親戚人數較多（人齊可以坐滿10圍）同埋Mr. Ha自己朋友亦唔少，所以我地打算擺30圍。為免拿取太多唔啱用嘅資料，我地都會先問咗可以擺幾多圍才要唔要遞上的資料。行完一圈，我地已經攞咗唔少資料。 

之前曾經聽過不少已結婚的朋友意見，喺酒樓擺酒其實不錯，因為依家好多酒樓的裝潢很好，嘢食亦有水準，價錢卻較酒店相宜。加上我之前去過幾位朋友喺酒店擺嘅婚宴，全部都係喺無窗嘅ballroom擺，好似喺密室裡面擺酒，我唔多想自己都係咁。我明白其實可以喺有窗有景嘅ballroom擺，俾多啲$$$囉!! 雖然唔使我俾錢，但我都唔想Mr. Ha要洗太多錢，寧願將啲錢用咗去旅行好過!! 因此，我地主要都係睇啲酒樓package。其實攞咗咁多料都係無咩心水，最好當然係實地視察啦!!

由於我地想搵啲交通方便嘅地點擺酒，所以去嘅酒樓主要都係位於油尖旺。我同Mr. Ha去過欣宴、星光行翠園、北京道1號帝延酒家、尖東帝國中心好彩&御苑皇宴。雖然映月樓個view靚，但要擺30+圍的話，招呼賓客會唔方便，因為有啲賓客要坐去另一邊。龍堡都有諗過，但個場好大同埋價錢都唔平。綜合我地嘅site visit，我地嘅結論：

欣宴：要擺30圍的話，就會要晒成個場。由於個場本身係由兩個細場組成，而reception喺係兩個細場中間。我地要晒成個場的話，有一半賓客要好多時候睇大電視，都唔似去飲。

星光行翠園：個景唔錯，但樓底矮。可以擺到30圍，但係個場L型，又有幾圍親友自己同自己食飯咁，要靠睇電視先知當晚情況。

北京道1號帝延酒家：個景當然好啦，北京道1號高層喎!! 佢個場係長形，唔會有親友要坐埋一個角落，要靠睇電視先知婚宴情況；但係柱位好多，有啲賓客可能會因為柱位阻擋視線而須要睇電視。

帝國中心1/F好彩酒樓：有維港景，可以擺到30圍，但係樓底比較矮，同埋裝修唔係我杯茶。

帝國中心2/F御苑皇宴：跟好彩一樣有維港景，亦可以擺30圍，感覺grand啲，樓底唔算矮，同埋裝修比較新（2007年才開業）。

其實去御苑睇場都係無心插柳，因為Mr. Ha提議去好彩飲茶，順便睇吓環境，咁咪叫埋佢爸媽一齊。去到好彩要等位，未有位時無無聊聊，見到樓上都有間酒樓喎，咪上去門口望吓。喺reception望入去，因為面向維港那邊全部玻璃窗，個場好開揚好光猛，啱晒我唔鍾意喺「密室」擺酒嘅人!! 初步感覺唔錯，於是喺好彩飲完茶後便走返上去御苑攞資料。Mr. Ha爸媽、Mr. Ha和我都幾鍾意個場，問埋佢地個期，嘩!! 2010年都有唔少星期六、日俾人book咗，最厲害係2011年都已經有人開始book!! 唔係吖嘛，使唔使咁早book定?? 真的嚇了一跳!!

雖然個場環境唔錯，但唔知食物水準如何，所以我同Mr. Ha分別同兩家屋企人去御苑飲茶。既然大家都覺得場地環境唔錯、交通便利，同埋食物都唔錯，一於決定喺御苑擺酒啦!!