中國館

有同事在復活節期間去了上海旅行，順道參觀中國館。她回來後問我，上次在世博排隊最耐用了多少時間，我說我們用得最多時間排的是參觀可樂館的隊，花了我們兩個小時才能進入可樂館。她說她今次參觀中國館排隊也排了兩個小時，當中有不少是參加旅行團的外省人。想不到世博過了這麼久，中國館的續展也開放了好幾個月，想不到還有這麼多人有興緻參觀中國館。

我還以為參觀中國館的門票是可以在網上預購，同事告知只有旅行社和團體才可以在網上download表格購票，而一般散客只可以在現場購票。同事說在現場購票的話又要排隊，為了節省時間，她和家人便每人花了30元買黃牛票。

過完購票那一關，又要到安檢那一關。還記得我去世博那幾天，安檢很有秩序，而且很快便完成，不過同事說她們那次就沒有這麼順利，好像沒有準則編排那一條隊的人可以進行安檢，所以花了不少時間在安檢上。最好笑的是，她那條隊裡有一個大陸人，看見鄰隊中有他的朋友，而他的朋友的那條隊正好可以進行安檢，那大陸人在眾目睽睽下便跨欄排到他朋友的隊中，不過當時公安沒有阻止他。那大陸人心想自己奸計得逞，準備魚貫跟隨朋友安檢之時，便給公安指着不准他安檢，罰他站在圍欄內，待其他隊的參觀者（包括我的同事那一條）安檢後，才讓他安檢。聽到這樣真的很心涼 ，不禁說了一句：「抵死」!! 因為我最憎人無禮貌和不守秩序，這種人真的很抵罰，可憐公安要用罰小朋友的方法罰他。同事說那大陸人覺得很「火羅」，但我覺得他們有些人是不怕羞和沒有所謂的。辛辛苦苦進入中國館後，同事居然發現那大陸人離奇地排在她前面不遠處，哈哈!! 相信那大陸人一定發揮他的左穿右插本領，所以才能這麼快進館。

同事參觀過中國館後說館內除了「清明上河圖」外，沒有太多值得看的東西。還記得世博期間，中國館內除了展示「清明上河圖」外，還有一些古董文物。可能世博完畢後，這些文物給運回各自所屬的博物館吧?! 不過，根據中國國家館的網頁，館內除了舊有的展示外，還有一些新增的展覽，不過就沒有了省市聯合館，可能展覽的東西數量不多，所以未能吸引參觀者的興趣啩??

我初時還以為中國館的展覽是永久開放，後來上網發現原來續展的展期只有半年（2010年12月1日 - 2011年5月31日）。我和Mr. Ha參觀世博時未能進入中國館和看「清明上河圖」，當時我們還打算遲些再到上海參觀中國館。多得二小姐的帶摯，我們可以在香港看了「清明上河圖」的預展，加上同事的評價，我們可以省回一筆了

Shanghai World Financial Centre - Observatory & Sky 94

喺酒店check out完，時間差不多2點多啲，我同Mr. Ha 就搭地鐵去陸家嘴嗰邊嘅上海環球金中心（SWFC），打算去吓觀光廳觀景啦!! 之前一日我問佢，打算check out之後去邊度?? 原來大家都不約而同諗住去呢個地方。因為我地前年7月去上海時，SWFC嘅觀光廳還未開放，Mr. Ha當時同我講，我地下次再黎上海的話就去呢度啦，所以我地都係做返1年幾前講過嘅嘢!!  

可能上海要推廣世博啦，所以持有世博門劵的話，可以9折買觀光廳的票。觀光廳有3層，價錢不同：94/F（RMB 100）、 97/F（RMB 110）& 100/F（RMB 150）。Mr. Ha揀咗去100樓，因為可以行懸空觀光走廊。其實買100樓嘅票，就可以落埋94樓和97樓。我地有世博門劵，所以每人只係俾咗RMB 135就可以去100樓。

買票之時，票務員都有提醒我地天氣唔好，最遠只可以睇到東方明珠塔。吓~~ 有啲失望，問Mr. Ha仲買唔買票，佢話無所謂照上去睇吓啦!! 先上去94/F，票務員都無講大話，真係大霧得只能睇到明珠塔。再上97/F，其實風景跟喺94/F睇到的差不多。去100/F之前，對條懸空走廊都有啲期望，點知唔係有好多玻璃地板可以直接望到下面啲建築物。如果多啲玻璃地板的話，我覺得視覺上會刺激啲囉!!

其實無咩風景睇係可以好快行完3層觀光廳，我地去到94/F，有個幾大嘅souvenir counter。除咗賣觀光廳紀念品外，仲有好多世博嘅紀念品。見仲有時間，我同Mr. Ha就去咗喺同一層樓嘅Sky 94食tea。哈哈，Mr. Ha話我地呢個係豪華團

坐喺94/F，望住上海景色食tea，感覺都唔錯。坐咗一陣，啲霧散咗啲，起碼可以睇到對岸。

呢間餐廳收嘅價錢唔算平，但食物質素就唔多得。我同Mr. Ha要咗每人一件咖啡味cheese cake同埋一杯English black tea。蛋糕外貌還可以，但食落居然係朱古力味!!! 明明個menu無朱古力味cheese cake架喎!! 隔離個杯係切粒嘅西瓜肉，唔通兩樣嘢一齊食埋之後會變咖啡味???

唔知點解English black tea用中國茶杯，難道呢啲係fusion，抑或係mix and match??

呢個tea認真唔得，我覺得收咗我地差不多RMB 150，啲食物無理由咁啩?? Mr. Ha話佢地嘅價錢只係因為餐廳嘅地點，跟食物質素無關。我同Mr. Ha講，早知啲嘢食唔掂，我寧願去金茂 Grand Hyatt 好過!!!

食在世博 VII - 美食太多、時間太少

我地得兩日半時間遊世博，唔計早餐，食盡只可以食到五餐，所以有好多國家館或案例館餐廳我地還未有機會品嚐。在暢遊或路過展館時，發現了以下餐廳：

馬德里案例館餐廳

呢間餐廳喺馬德里案例館裡面，餐廳招牌並不是好明顯，所以從外面的空地睇未必咁容易會知道有呢間餐廳嘅存在。我都係入咗去案例館，上到2樓，見到有個指示餐廳嘅方向才知道佢嘅所在。我地去到案例館時都已經過咗午飯時間，加上浦西案例館園區相對較少遊人，所以我地只在餐廳外面望望，並無入去食嘢（食完德國館餐廳已經好飽）

驟眼望望寫在黑板上的價錢並不是很貴，可惜的是我地第一日已經喺巴塞隆那案例館已經食咗一餐西班牙菜，我地得5個quota，所以都係同呢間餐廳無緣嘞!! 後來，返到香港上網，見到有位台灣網友嘅blog，網友去咗呢間餐廳食飯，對啲食物讚不絕口。

 

倫敦案例館 - 零碳館

展館餐廳喺地下嗰層，如果唔係我地第一眼只留意到展館大門口的話，其實餐廳地點都好易搵。本來打算經餐廳離開展館，但喺我失望無得買紀念T-shirt時，就俾我地發現餐廳一角有啲souvenir賣。由於要等人攞T-shirt俾我地，所以我地喺餐廳坐咗一陣。呢間餐廳佈置其實幾特別，貫徹環保嘅理念，因為裡面嘅擺設同埋傢俬都係用啲人家棄置嘅廢物造成，例如：天花用唔要嘅玻璃樽裝飾、櫈係用唔要嘅水喉管做成、枱面係用一塊玻璃加廢棄嘅車軚做等等。

    

從佈置嘅格局，我覺得餐廳offer嘅食物一定唔會係法國大餐之類嘅食物。我略略望過貼在牆上的menu，食物種類唔算多，價錢亦唔貴。喺我地等攞T-shirt嘅時候，我見到坐喺我地隔離有個約10歲小朋友叫了一客啡色嘅飯，外觀不太吸引我，味道好壞就不得而知了。可能餐廳要貫徹環保理念，所以我見小朋友揸住一對好似樹枝嘅筷子食飯，因為樹枝有啲粗，我見小朋友都揸得不太習慣。

 

布拉格案例館餐廳

呢間餐廳喺案例聯合館4裡面，餐廳座位唔多，我估有十幾個。食物價錢唔貴，不過我覺得餐廳以cafe形式經營，應該未必有太多食物款式，飲tea就應該無妨。比較特別係餐廳裡面有一個布拉格天文鐘嘅裝飾，好多人都同呢個天文鐘影相。如果唔想做人肉佈景板的話，就一定唔好坐喺個鐘嘅下面。

 

波蘭館餐廳

去波蘭館時時間尚早，所以唔多覺餐廳裡有人幫襯，只見有好多人排隊入館。餐廳外並無擺放任何menu，睇唔到餐廳多唔多食物款式。不過，根據佢地放了poster嘅stand和白板上的資料，食物價錢跟一般國家館餐廳差不多，但樣子就吸引唔到我有意欲去試嘞!! 食tea就無所謂，食lunch的話我可能揀其他國家館餐廳。

  

 

立陶宛餐廳

呢間餐廳位於立陶宛館裡面嘅一角，約有20個位，唔算好細。佢地嘅食物價錢唔貴，仲好似日式餐廳咁將啲食物樣本擺出黎俾人慢慢揀。

 

比利時館餐廳

去世博之前，曾經見過雜誌介紹呢間餐廳。因為餐廳地點比較隱閉，要問職員才會帶你去，加上個心已經一早諗住去德國館餐廳食晏，所以忘記了「咁近城隍廟，求番枝好籤」。去完比利時館後，無去試呢間餐廳嘅食物，同埋玩吓個iPad。我見上文提過嘅台灣網友嘅blog，都有提過去過呢間餐廳食飯，形容啲食物好正，唔記得去食真係有啲可惜!!

 

俄羅斯館餐廳

我之前都知道俄羅斯館嘅佈置好靚，有如Alice in the Wonderland一樣。如果唔係我睇台灣網友嘅blog，就唔知佢地原來都有一間國家館餐廳，佈置又好靚，食物質素又好。不過，地點就較為隱閉，唔會咁容易睇到。最緊要就係，佢印證咗可以去完國家館餐廳後，就可以免排隊暢遊展館。可能，佢地擔心啲人白撞，所以要食客自己問才會指點條秘道俾你直通展館。因為，我喺瑞士館餐廳食晚飯時，就見過有大陸同胞自己走入餐廳，當然唔係幫襯食飯啦，而係自己搵餐廳後門入去展館，好在俾waitress姐姐捉返出黎!! 天呀，咁都得，俾人捉返出黎幾瘀呀!!! 難得同胞唔當咩嘢一回事喎!!!

 

法國館6Sense餐廳

呢間餐廳唔使多講，好多人都知道佢地嘅存在。可惜我已經喺羅阿案例館食了法國菜，為咗留quota，就唯有犧牲6Sense啦!! 唯有阿Q啲諗：好在羅阿案例館餐廳都唔錯，價錢仲要比6Sense平1/3!!  我去國家館嘅餐廳食飯，最擔心就係要花時間搵餐廳入口，因為有啲餐廳喺展館入面，有啲則有另一個入口。之前睇Katie's blog，知道6Sense入口跟法國國家館係分開的，自己親身去過見到餐廳入口有一把印有餐廳名稱嘅太陽傘「棟」咗喺度，唔會驚搵唔到!! 

 

世博園區裡面有好多國家館嘅餐廳。如果我可以去7日的話，我就可以起碼試14個不同國家嘅美食。其實，我覺得可以一次過品嚐唔同國家嘅美食，比起攞住本世博護照趕住去揼印更有滿足感。雖然本護照可以喺得閒時拎出黎睇吓，但對我來說，食落肚同埋親身體驗更加印象深刻。可惜的是，美食太多，時間太少......................

食在世博 VI - 注意事項

去上海之前，已經一心諗住食外國大餐，完全唔會考慮食吉野家、KFC、Pizza Hut之類喺香港都可以食到嘅餐廳。為咗搵好嘢食，出發前都有做到啲功課。不過，理論同實踐真係兩回事!!

綜合我地喺世博園區呢兩day半，我覺得搵食時要留意以下幾點：

1. 留意國家館餐廳嘅營業時間，否則的話，就會好似我地第1日烚吓烚吓去唔到羅阿案例館食飯。


2. 有啲餐廳只收現金，例如：德國館、捷克館。如果帶唔夠現金又唔想禁機攞錢的話（點知上海會唔會又有假嘅櫃員機架?? ），又或者要留返啲彈藥應付餘下行程 or 買海寶，就可能要喺啲收credit card嘅國家館餐廳碌卡埋單。


3. 以我所知所見，好似得法國館6sense餐廳 & 法國羅阿案例館餐廳要訂位，其他國家館餐廳或案例館餐廳可以walk in。如果要喺世博園區平食法國餐，記得早啲預約。根據經驗，最多人喺8點食晚飯，所以要book呢個時間食飯一定要早啲book。


4. 好多國家館都有附屬餐廳，有平有貴。聽二小姐講，佢有同事去上海遊世博，去咗韓國館餐廳食飯，完全唔貴，只係食咗40大元正!! 如果我知道的話，一定會去試吓，因為Mr. Ha幾鍾意食韓國嘢。我路過韓國館時，超多人排隊入館，完全無行過埋去，之前喺forum又無見人提過佢地有餐廳。所以，參觀展館時順道望吓有無餐廳，同埋食啲咩、價錢等等，可能有意外驚喜食到地道外國菜。


5. 返黎香港後，Mr. Ha上forum睇，知道原來可以唔使排隊直接入去意大利館餐廳食嘢。食完仲可以免排隊暢遊展館。聽聞有啲歐洲區展館都有啲咁嘅安排，可以去完佢地嘅餐廳食嘢後，唔使排隊可以去展館參觀，但孰真孰假就不得而知。可能呢個係新安排啦，我去之前forum都無人提過   多啲人去佢地國家館嘅餐廳食嘢，可以賺多啲人仔嘛，呢個絕對係吸引人去餐廳幫襯嘅好方法!! 如果呢個安排係真的話，咁就真係激死我!!! 嗚嗚嗚.......德國館呀、瑞士館呀.........


6. 隨住世博舉行咗一段日子，已經越來越多人去過，可以多啲睇人家嘅blog或者上forum取經。我自己都係咁做，只不過係我去上海之前無咁多料post出黎。其實，除咗最多人講嘅法國館餐廳外，一定仲有其他好食嘅國家館餐廳，只係未被發掘或者只係一小撮人知道佢地嘅存在囉!!

食在世博 V - 捷克館餐廳

餐廳名稱：捷克館餐廳

好味程度：

付款方法：Cash Only

 

我地喺上海只逗留3日，最後一日只可以喺世博園區留一個上午，所以我地只可以一共品嚐5餐外國菜。本來我好想去意大利館餐廳試吓，餐廳喺展館裡面，初時以為要排N個鐘頭才可以入去食嘢。既然我地得半日，無理由將所有時間排意大利館嘛，咁唯有放棄啦!! 好在後來返到香港睇forum，有網友話意大利館餐廳唔好食，香港大型連鎖快餐店嘅意大利粉仲好食云云，咁我可以用阿Q嘅「精神勝利法」安慰自己，無去食都無洩底吖，哈哈!!

我地都係入咗去捷克館，見到佢地有個餐廳，不過跟展館相連嘅玻璃門鎖咗，想入餐廳食嘢的話就要從另一個入口出入。

因為我地要兩點前返到去酒店check out，所以今日11:30就去食晏。雖然我覺得時間尚早，但見到已有幾枱客人坐咗喺度。我見兩個waitress忙於take order，為免因食飯時間太耐而令我地唔夠時間執行李遲咗check out，我唔等佢地，自己直接去攞menu睇。好在佢地成間餐廳唔係只得兩個waitress，食食吓見到有成4、5個waitress，另外仲有一個應該係捷克籍嘅waiter。

我覺得佢地本menu幾好，圖文並茂，食客唔使只靠佢地嘅description而決定食咩。

可能係心急嘅通病，加上唔想遲返酒店check out要補錢，所以我好快咁睇咗menu決定食咩，落完order後才將本menu慢慢遂頁睇。除咗食物介紹外，佢地本menu仲有國家參展代表序文（睇完先知捷克有地道嘅饅頭片，不過order已落，再叫埋呢樣我地會食唔晒!!!），同埋厨師履歷簡介，所以佢地本menu好似成個clear holder咁。咁樣幾好，俾食客可以多啲了解吓間餐廳同埋厨師。根據厨師簡介，個個喺當地都來頭不小或者喺外國大酒店身居要職（哈，正常都會咁講啦，唔通話佢地名不經傳咩!!），同埋佢地都曾經喺2005年日本愛知縣世博嘅捷克館餐廳工作。真係幾似打世界盃，要啲出去外國踢波搵食嘅球員回國踢國家隊一樣!!

我地miss咗嘅其中有饅頭片嘅dish：

離開嘅時候，都見到有啲人叫咗呢啲食物。驟眼睇啲饅頭片，我覺得同平時中國饅頭無咩分別。哈哈，又要用阿Q嘅「精神勝利法」安慰自己嘞

我地就叫咗1杯可樂、1杯冰茶（好甜）1個salad、2個湯、1個main course & 1個dessert，咁就可以每樣都試吓

Cucumber Salad with White Yogurt （黃瓜沙律配白酸奶）     RMB 50

Beef Broth with Noodles （牛肉湯麵）     RMB 60

Potato Soup （薯仔湯）     RMB 60

Kaplice Potato Pancakes with Smoked Meat and Sauerkraut （卡普利采德國泡菜和燻肉薯仔煎餅）     RMB 180  

Apple Strudel （蘋果卷）    RMB 60

沙律無咩特別，味道OK；薯仔湯都唔錯。我唔食牛肉，Mr. Ha話個牛肉湯麵啲湯無牛味。我飲咗一啖，唔講真係唔知呢個係有牛肉嘅湯，完全無羶味，真係唔知好定唔好。問Mr. Ha啲湯麵「淋」唔「淋」，佢話有啲啦!! 我自己就唔鍾意食「淋pat pat」嘅嘢，再加上有牛肉，唔啱我!! 本menu介紹牛肉湯麵，用咗一句「像祖母過去自己做的麵湯」(Soup with homemade noodles just like Grandma used to make)。睇完中英文version，都唔明點解咁形容個麵。可能捷克人嘅婆婆或麻麻會用咁嘅方法煮麵啩??

我同Mr. Ha覺得全餐飯最好食係泡菜薯仔煎餅，啲泡菜似我地上次去德國館餐廳食嗰啲，個薯餅都唔算「粉」，味道唔錯。

至於apple strudel，無我想像中咁好食，比較「淋pat pat」。可能食咗咁多嘢已經有啲飽，食埋個apple strudel之後，覺得有啲「漏」。我見menu影apple strudel張相真係幾靚，又好似幾好味，但理想同現實總係有啲差距............

呢餐飯食咗1個鐘，用咗RMB 430。我拎張單去埋嘅時候就發生咗一段小插曲。話說負責cashier係一位外國（捷克籍??）waiter，我將5張100元俾佢埋單，但因為佢未見過藍色嘅100元人民幣，還問我呢啲係咪港紙?? 哈哈，唔知可以睇吓銀紙上面嘅英文嘛!! 跟住另一位捷克籍(??)waitress走埋過黎睇，我同佢地講藍色嘅100元人民幣係1990年出，而佢地常見嘅紅色人民幣係2005年出，銀紙上面都有註明。我啲銀紙係香港銀行換返黎架，之前都有用呢啲舊款人民幣找數，同胞們都無問題。不過，我都明白佢地好驚會收到假人民幣，因為我自己都驚，好在我同Mr. Ha仲有5張紅色100元人仔，咁我咪俾啲佢地見過嘅100元人仔找數囉!! 於是，佢地就開心咁收錢，而我又可以走得嘞!! 不過，其實佢地唔知現行流通嘅100元人仔都可以有假呢..........