Wedding Cake IV - Cake2

拎住Mimosa嘅蛋糕，走去附近嘅Cake2。今次去Cake2，從店外望入面無客，又唔見sales姐姐，以為佢地公眾假期休息。心想無理由吖，星期日佢地都開，無理由公眾假期休息嘛!! 試吓推門，門無鎖喎，咁就展開我同Mr. Ha嘅wedding cake day第2站嘞

入到去就有sales姐姐出黎招呼我地，俾相我地睇。其實之前去過一次睇相，又睇過display wedding cake，對佢地都有啲印象。所以今次問咗好多問題，例如：fondant cake嘅icing cover會唔會好厚?? 會唔會好甜?? 切起來會唔會好易碎晒?? 幾時delivery?? delivery包唔包setup?? 邊款蛋糕係fondant cake or cream cake?? ......問了一大堆問題，其實都好矛盾，因為fondant cake造型可以有好大flexibility，但icing cover未必人人鍾意（特別老人家），牛油蛋糕無咁鬆軟；相反cream cake因為係sponge cake，所以比較鬆軟，唔鍾意cream cover可以撥開唔食，但係造型無咁多變化.....唉，都幾難決定，不過可能比較prefer cream cake。可能sales姐姐見我好兩難啩，所以再介紹cupcake同mini-cake。個人唔鍾意wedding用cupcake，因為唔夠formal，又好似有pat cream嘅「媽寶蛋糕」咁，睇相嘅造型唔多吸引，所以唔打算用cupcake。到sales姐姐介紹mini-cake時，我開始搵到我想要嘅嘢

佢地嘅mini-cake係用cream cake底，造型好精緻，好似一個細細個嘅wedding cake，好靚!! 心中都開始有啲決定，但唔知佢地啲蛋糕味道如何，無理由個蛋糕淨係得個樣靚，但係唔好食架嘛!! 可能sales姐姐見我唔係混吉，所以話俾我聽逢星期日都有試食，不過要預約。我梗係有興趣啦，喇喇聲請佢幫我預約，o黎緊月尾有得試，好期待!!!

喺Cake2磨咗差不多1個鐘，要問嘅嘢大致上都問咗，都係時候走。Mimosa嘅napoleon同埋orange almond cake等我返去食呀，哈哈!! 回程時問Mr. Ha意見，佢都同意mini-cake係一個唔錯嘅idea，仲居然諗到一樣我無諗過嘅問題：我地喺5點幾證婚，之後切蛋糕，waiter要時間分餅，咁咪要啲賓客等囉!! 分餅可能有大有細，可能呢個又話我個「舊」細啲、切件餅切得唔靚....Mini-cake就可以免除呢啲麻煩嘞!! 又係喎，不得不佩服佢嘅細心，哈哈!!