Wedding Expo

去咗expo咁多次，今次應該係最充實嘅一次

我地去咗Forever Couple訂造戒指、約做家計會婚前檢查、book疫苗注射、買利是封同埋買DYOS訂造鞋嘅coupon。今次有目標去expo，加上我地又好早入場，我發覺我地好efficient。12點幾入場，未夠2點已經做完以上嘅嘢。可能我地入場時間早，個場sales多個睇嘅人，所以有好多sales哥哥姐姐俾嘢我地，同埋叫我地睇吓佢地嘅booth，嚇得Mr. Ha一枝箭咁向前標!! 我就慢慢行，sales哥哥姐姐遞嘅資料，無用/無需要就唔攞，費時浪費兼之後要送進廢紙箱。其實，影相、婚禮攝錄、租衫、場地、花球、禮餅、證婚律師已經搵咗，所以都唔需要攞呢啲資料，比之前輕鬆得多。

以往唔多覺得家計會喺expo擺booth，但今次無意中發現佢地。上幾次去expo攞咗唔少婚前檢查嘅資料，其實幾間唔同機構提供嘅package所包括嘅item差不多，價錢亦相若，搵邊一間都只係在於可靠性。家計會是否可靠無容置疑，雖然價錢較其他機構的略高，但多了醫生診症及檢查身體，所以我地選擇了家計會兩個package中價錢較高的那一個。之前睇forum，見有啲網友話家計會嘅婚前檢查好多人join，所以都有啲擔心要好遲先有得做。不過，我地join之時，負責的那位姐姐幫我地check，6月尾有期做checking，於是嗱嗱聲confirm埋時間。又完成多一個item

約咗做婚前檢查，我跟住就搵疫苗注射嘅booth。擺booth只得幾間公司，價錢幾多都心中有數，全都是$2,780打三針。今次，我發現最少兩間嘅價錢係$2,700，比我之前行expo時平了一點（不過，之後才知家計會仲平些少!!）。哈，因為我已經打算打當中某一隻，而幾間booth提供的又不是我想打的那一隻，所以我好容易就決定到book邊間打疫苗。去到booth，唔使姐姐介紹（因為之前已經問咗相熟醫生嘅意見），confirm打邊一隻疫苗，好快俾咗錢，約時間打針，咁又攪掂一件事!!

我地之前行expo已經諗咗Mr. Ha回禮嘅利是封用邊一隻款。雖然個款算幾普通（有啲似紅雙喜火柴盒的那一款），但唔係每一間喜帖舖都有得買。搵到有一間有得買，即刻俾錢攞貨!!

其實買DYOS嘅coupon都係無心插柳，之前佢地做promotion，喺ESDLife個website度填咗啲資料，就可以免費攞到兩對新婚囍字拖鞋。本住貪小便宜嘅心態，當然有填啲資料啦!! 去到佢地個booth攞咗兩對拖鞋，sales姐姐當然唔會放過做生意嘅機會啦!! 佢猛同我講訂造鞋有幾好，我自己本身都有訂造返工鞋，覺得tailor-made會着得自己舒服啲。既然佢地個package都算抵，加上二小姐、三小姐同埋米米都要造新鞋，啲coupon一定用得着，所以好快又俾錢了!! 真係洗錢容易，儲錢就慢 

雖然今次行expo好有效率，達到我預期嘅目標，但係仲有啲「濕碎」嘢未買、rundown未訂實，所以仲要繼續努力!!