Wedding Cake IX - Order Confirmation at Cake2

今日去完wedding expo，我、Mr. Ha同埋米米跟住去Cake2落order。

上次去完Cake2後，我地將幾款mini cake嘅相俾三位話事人睇。哈哈，佢地不約而同都覺得蛋白mini cake靚，完全唔覺得啲mini cake用火槍烘啡咗啲邊唔好睇，反而仲覺得好特別添!! 真好，我初初都因為sales姐姐話老人家未必鍾意蛋糕有啲「黑麻麻」的一番話擔心，依家唔使擔心啦!!!

去到Cake2，我地又搵返之前serve我地嘅sales姐姐，confirm我地要蛋白mini cake。佢反而有啲出奇我地三位話事人無問題喎 我地暫定要60個mini cake，每款mini cake各要30個，米米好鍾意其中一款，所以另要多6個送俾朋友。決定咗數量後，我地就要confirm蛋糕味道。上次試味時，我地已經諗好mini cake嘅味道分別係：咖啡味海綿蛋糕+朱古力軟心脆脆 & 綠茶海綿蛋糕+栗子蓉。到決定最頂一層蛋糕的味道時，我地都有諗究竟要邊一隻味好。我自己幾鍾意咖啡味海綿蛋糕+朱古力軟心脆脆，但Mr. Ha就想要另一隻唔同嘅味道。可能佢又鍾意食黑森林蛋糕，所以最後佢決定要黑森林蛋糕做頂層蛋糕嘅味道嘞!! 因為米米未試過Cake2嘅蛋糕味道，我就同sales姐姐即刻買一件蛋糕俾米米試食。既然米米鍾意飲咖啡，我就幫佢揀咗一件Tiramisu。食之前梗係要幫件蛋糕影番張相啦~~

我自己都有試幾啖Tiramisu，覺得海綿蛋糕好食啲。不過，件Tiramisu個樣都好靚 一邊食蛋糕，我地就跟住決定埋頂層蛋糕要咩樣。睇咗好多相，終於我地決定咗款式，成個蛋糕會係白色，係一個蛋糕面上鋪滿玫瑰花嘅款式，玫瑰花下面嘅葉會唧淺綠色嘅cream，同埋蛋糕餅身會有啲點點花裝飾。我地prefer整個蛋糕清啲，唔會有太多顏色。

決定晒蛋糕嘅嘢之後，我地就同sales姐姐商量個mini cake stand。我覺得Cake2租俾我地放60個mini cake嘅stand唔靚，反而另一個要買斷就好得多。其實我鍾意另一個全透明，用arcylic膠做嘅mini cake stand仲靚，不過無放60個mini cake嘅款，佢地有嘅起碼放100個。我依家仲心大心細，淨係得呢一樣未有決定。Sales姐姐都話俾我聽，佢有同公司反映可唔可以租，唔使買斷，睇吓遲啲會唔會有好消息啦!!