食在世博 I - 巴塞羅那案例館餐廳

餐廳名稱：Torres Wine Bar（桃樂絲葡萄酒吧）

好味程度：

付款方式：Cash / Credit Card

呢一餐係我地喺世博嘅第一餐。黎呢間餐廳都係無心插柳，本來打算去食法國羅阿案例館嘅餐廳，去到已經差不多3點，打算食個tea啦!! 點知原來人家有營業時間，reception counter嘅姐姐話午飯時間已過，依家餐廳休息，夜晚6點先開，所以無得去食。咁啱之前去案例聯合館第4館時，見到喺巴塞隆那案例館對面有呢間酒吧餐廳，於是就過返條橋黎呢間食晏。

呢間餐廳可能主力係酒吧，所以食物款式唔算太多，主要係沙律、湯、小食（佢地menu上寫呢啲係Mains，但我覺得似appetizer多啲）、甜品。因為時間已經係3點幾，我同Mr. Ha都唔想食得太飽，費時食下一餐時食唔落，所以我地點咗幾樣食物：

Salad - Arugula Salad（小芝麻菜、小蕃茄、非達芝士加意大利黑醋）  RMB 48

Soup - Salmorejo（有橄欖油、洋葱和大蒜的吞拿魚蕃茄湯）  RMB 38 

Mains - Smoked Salmon（煙三文魚配檸檬汁）  RMB 58

Tapas - Cheese Toast（法國麵包片配藍莓醬和布里芝士）   RMB 28

我個人覺得沙律和三文魚無咩特別，同平時食的差不多；反而我同Mr. Ha鍾意個吞拿魚蕃茄湯。落order之時，姐姐已經特別提醒我地個湯係凍嘅。佢解釋因為有啲中國人唔鍾意飲凍湯，覺得湯應該要熱飲，驚我地會誤以為呢個湯係熱湯。我地反而覺得咁樣仲特別，無咩所謂，所以照落order。Mr. Ha話西班牙人天氣熱都唔會飲熱湯，所以佢地啲湯通常都係凍嘅。個湯飲落好好味，可能因為我鍾意食吞拿魚同埋蕃茄啩??  既然個湯咁特別，Mr. Ha想叫埋另一個西瓜湯，呢個係一個有蕃茄、橄欖油、大蒜和洋葱嘅西瓜湯。我自己都覺得幾得意，都好想試吓，但姐姐話西瓜湯賣晒，所以無得試，咁唯有encore吞拿魚蕃茄湯啦!! 真係好飲呀!!

姐姐都好細心，佢同我地講，因為Cheese Toast係甜嘅，佢會等我地食晒所有嘢後才上呢一味。Cheese Toast雖然喺menu上屬於Tapas類別，但我覺得佢應該屬於甜品。佢比一般甜品無咁甜，連埋布里芝士一齊食，味道都唔錯。

埋單時，姐姐特別問我地覺得個湯點樣，佢話佢好鍾意飲呢個湯，但好多中國人唔鍾意，佢地一聽到個湯係凍嘅就唔落order。我話我地相反好鍾意，個湯幾特別，再加上用嘅材料係我地鍾意食嘅嘢嘛!! 姐姐聽得幾開心呀!!

食呢一餐用咗RMB 260，我覺得每一款食物都唔算貴，值回票價啦!!

(1)        Sparkling Water x 2                  RMB 50

(2)        Arugula Salad                           RMB 48

(3)        Salmorejo x 2                           RMB 76

(4)        Smoked Salmon                       RMB 58

(5)        Cheese Toast                           RMB 28  

                                            RMB 260