DYOS

趁今日去跑馬地飲茶，我就提議去DYOS睇吓啲鞋。因為二小姐話識路，所以我無check過地圖先locate一下DYOS嘅地址。之後佢發現自己記錯咗，大家都花咗啲時間才去到。DYOS有兩層，一層係專門display返工鞋，另一層就display晚裝鞋。

二小姐未諗自己當日着咩衫，加上佢又唔姿整，所以去到DYOS後，就跟四少和Mr. Ha坐埋一邊玩i-Touch。只得我、米米和三小姐3個人睇鞋，我又唔想佢地百無聊賴，所以同米米睇咗一陣就走，寧願下次我地3個人自己再黎慢慢睇。

不過，今次上去DYOS都有啲收穫，睇咗啲款，問咗有咩顏色可揀。我睇佢地本catalogue，留意到每對鞋嘅價錢有兩個，分別係：order-made & custom-made。顧名思義，custom-made嘅價錢當然係貴啲。我初時以為custom-made係改鞋嘅顏色或微調鞋款，但原來custom-made係就住客人嘅腳形tailor made對鞋，改顏色仍然都係order-made。由於custom-made嘅工驟多啲，所以做鞋嘅時間要長啲。我問姐姐需時幾耐，佢就講今日訂order-made的鞋好似要6月尾、7月頭攞，而custom-made的話就要8月才有得攞（即係大概要1個多月）。為咗唔想太趕，我可能要快啲再同米米黎DYOS睇鞋了。就算最後睇唔啱，都可以去其他舖頭做鞋嘛!!