兄弟姐妹

星期五晚回家，發現洗手間裏的洗手盤給弄得整個向下，支撐洗手盤的三角鐵本身都已經生鏽，不堪撞擊之下也斷了。原來是米米貪一時之快不用鋁梯，只是站在馬桶邊將東西放上吊櫃。結果呢，因為馬桶邊有水，而佢自己又唔係好夠高，所以唔小心跌親，攪到膝頭損了和腳指公腫了一大片，仲走路時一拐一拐。因為跌下來時借力，所以洗手盤的生鏽三角鐵給弄斷了。最攪鬼係佢扮唔痛，但係就俾我發現佢靜雞雞搽藥酒!!! 唉，隻腳指公又腫又瘀點會唔痛吖，點呃人喎

以我非常淺薄嘅醫學常識，如果裂骨的話，就算是非常能忍痛的人，都應該不能走路。既然佢都行得到，我估佢應該係啲皮肉嘅傷。第二日一早，我地四個圍住米米，問佢做咩咁勇，知唔知咁樣好危險.....（下刪三千字），四個人一人一句，米米都被我地圍剿到暈。梗係啦，跌親可大可小，攪到行動不便就麻煩了。

為免大家擔心，最好就係照吓x光，confirm隻腳無事啦!! 我就負責帶米米去睇醫生，而二小姐同四少就負責搵人整番個洗手盤。米米睇完醫生，照埋x光confirm無裂骨，又做埋物理治療，情況好多了。物理治療師建議米米幾天後回去覆診，剛巧我又唔能夠早放工，三小姐身先士卒話可以早啲放工陪米米覆診。幸好我家有幾兄弟姐妹，可以大家分擔吓工作，否則的話，一定會做到氣咳!!