結婚其實真係好多嘢要搞，其中一樣好緊要嘅就係我嘅wedding dress & evening gowns!! 最初完全無咩頭緒，喺wedding expo入面見到好多舖頭將啲衫show晒出o黎，真係花多眼亂!! 早一兩年我有個同學結婚，好多時候都會問佢意見。佢見我一舊雲，就陪我行金巴利道，睇吓啲舖頭嘅衫，同埋攞啲package睇吓。行完一圈，都睇咗好幾間舖頭，有啲舖呢，我就鍾意佢啲婚紗；又有啲舖呢，我就鍾意佢啲晚裝喎!! 有靚衫嘅舖頭嘅package都唔平。因為Mr. Ha唔喺度，所以都係純粹睇吓。除咗尖沙咀，我同米米都有去過金都，等米米都有啲idea，諗吓自己到時着咩衫。行完金都之後，米米同我講，佢唔鍾意金都啲款。哈哈，佢地Mr. Ha的媽媽又有相同諗法!! 之後，我又曾經同佢和米米睇過金巴利道另外好幾間，但係都係呢間鍾意一件，嗰間又鍾意一件!! 好煩呀，因為我無可能呢度租一件，嗰度租一件嘛!! 一來價錢會貴；二來還衫還死我呀!!
記得我同學籌備嗰陣時，成日都提到佢搵嗰位designer, Janny Wong, 啲衫好靚，讚到上天咁滯!! 當時心諗：有無咁犀利呀?? 於是，我就上forum睇吓有無講關於Janny啲衫嘅posts啦!! 上到ESDLife，見到有好多posts關於Janny啲衫，真係好多人讚佢啲衫（什麼xx公主第x代之類）好靚。可惜無相睇，所以無從判斷。既然我仲未決定到搵邊間，於是我同學提議我地睇吓Janny嘅presentation。原來Janny係freelance designer，無自己地舖，無自己website，但喺元朗有自己嘅workshop。咁多人識佢都係靠口碑，厲害!! 如果要睇Janny啲衫，就唯有睇佢嘅presentation。
打電話約睇presentation，原來唔係每個星期都有得睇，11月嗰個presentation去唔到。11月尾再打俾佢，佢話12月12日有presentation，呢次會係09年最後一次，之後就會加價。除咗同Janny預留兩個位睇presentation之外，都有問吓啲package價錢。淨聽價錢，都覺得比金巴利道有啲地舖貴，不過都要睇吓啲衫點樣，先知係咪物有所值。
Janny喺電話度提我：presentation會有問答環節，答中1題平$100，不過呢個優惠只適用於presentation當日即時落order。最好笑係，佢叫我到時記得帶「黑照」去睇presentation，因為怕俾啲衫「橙」襯對眼喎!! 吓，唔係吖嘛，聽完撻低咁滯，係咪爛gag黎架
No comments:
Post a Comment