今天和米米、三小姐飲完茶後，我和Mr. Ha去了Forever Couple俾指紋做我地嘅結婚戒指。今次招呼我地嘅係一位sales哥哥，佢攞咗我地張單對咗資料後，就攞咗一塊塗咗黑色油墨嘅膠板俾我地，叫我地將打算印指紋的那隻手指印上油墨，然後將指紋印在白紙上。
印指紋之前，sales哥哥都分別喺我地手上示範印指紋嘅力度。佢仲問我地趕唔趕時間，因為印指紋未必一擊即中，可能要印好幾次才能收貨。我地預咗去Forever Couple係今日最後一項活動，所以可以慢慢玩
由我先開始印指紋，初初未能掌握力度，指紋不是太深就是太淺色。sales哥哥話我地印咗落白紙嘅指紋會用電腦scan，然後造戒指，所以我肉眼覺得OK嘅指紋其實唔合格
我每印完一個後，sales哥哥就好似補習老師咁check吓個指紋印得好唔好。因為我用無名指印指紋，而呢隻手指唔似拇指咁常用力，所以我花了唔少時間掌握印指紋嘅力度。Sales哥哥見我印了好幾行指紋，就叫Mr. Ha試吓印。於是，兩個人就各自喺白紙上玩指紋copy book嘞!!
問sales哥哥，一般人客通常印幾多個先會有一個佢地收貨。佢話有客人印幾個就已經OK，但試過有客人印了4張A4紙，仲要兩面印滿，才搵到合格做戒指嘅指紋。嘩，咁咪留咗喺佢地office好耐? 佢話差不多3個鐘
無辦法啦，印唔到就造唔到戒指喎!!
我諗我應該唔使咁耐啩，因為我印到第3行已經開始掌握力度，但最衰係要啲墨夠深色。橫掂我地又唔趕時間，於是就慢慢印，印滿一張紙為止
Mr. Ha初初都用無名指印指紋，但發覺效果唔係咁好，所以就試用拇指同埋食指。最後，我地兩個分別印咗兩張紙，Mr. Ha印咗118個指紋；而我就印咗113個，手指都有啲「梗」。不過，我覺得幾好玩
Mr. Ha's copy book
My copy book
經過sales哥哥初步鑑定，已經有幾個可以用來造戒指了。佢之後仲攞去俾師傅睇吓係咪OK，同埋揀一個最好嘅指紋造戒指。等結果其間，Mr. Ha講笑話好似等測驗成績一樣。等咗一陣，終於有結果，師傅分別喺我地兩個200幾個指紋中揀咗2個。哈哈，終於可以走得，咁又消磨咗1個鐘。Sales哥哥話2個月後，即8月中應該會有戒指。真係期待我地呢對獨一無二嘅戒指呀!!
No comments:
Post a Comment