由於要決定結婚場地要唔要佈置同埋有幾多item要做，所以我同Mr. Ha今日下晝去御苑飲茶。兩個人飲茶食唔到好多款點心，於是叫埋Mr. Ha的爸媽一齊飲。
約2:30p.m. 到達御苑，打算攞位飲茶，點知知客姐姐話：「我地截咗茶市嘞!」。咁早??!! 其實開心就真，因為我地會約5點幾證婚，所以都擔心佢地好遲先交到場。就住呢過問題，我都有問過勞小姐，佢話我地想佢幾點交佢地咪預返幾點囉!! 咁好?? 會唔會唔得架?? 經過今日親身經歷，我開始相信她呢番話唔係信口雌黃!!
因為御苑無得飲，我地唯有落樓下飲，兩點幾樓下飲茶都座無虛席，仲要等一陣先有位。飲到3點幾，都有部分人埋單走人，我亦見到有啲waitress開始佈置場地，但係仲有人繼續入黎飲茶。心想：仲唔截人，咁幾時攞到個場?? 不過，最經典都係見到waitress將粉紅色嘅枱布鋪喺賓客席上，希望佢地仲有嘢再鋪上去啦，隻粉紅色好.........正..........囉!! 慶幸Mr. Ha有要求
飲到差不多3點半，便埋單上去御苑睇佈置。去到已經無晒茶客，waiter、waitress已經開始set枱。今次上去除咗睇佈置，仲要問勞小姐其他嘢，趁佢招呼緊人，我就自己周圍巡，順便影相做record，以便跟住決定要唔要做venue decoration。
維港一、二廳
Reception
Reception Table
相薄枱
主家席
賓客席
今次好認真同好仔細睇佢地啲佈置，雖然係standard decoration，但我覺得唔錯。不過，都擔心啲證婚枱、蛋糕枱嘅佈置。勞小姐終於都招呼完客人，到我問問題了，哈哈!!
問佢有無證婚枱、蛋糕枱佈置後的相，佢話其實同reception table、相簿枱相若，咁我覺得都OK嘅!! 至於證婚枱擺法，就會根據律師要求，因為唔同律師有唔同擺法。OK，因為證婚律師係Mr. Ha個朋友，應該易商量
不過，佢講咗一樣令我為之一振嘅嘢，就係啲backdrop、reception table、相簿枱等的佈置會喺6月尾、7月頭改過，咁我一直都好關心嘅木地台呢?? 都會有機會一併執埋，咁就好喇!! 我都有問個colour tone將會係點o架，因為我有好多嘢都取決於個colour tone嘛!! 佢話應該同依家差不多，咁即係點呢?? 佢話啲design仲睇緊，依家唔能夠答得實，仲叫我7月中call佢，到時睇吓個新decoration。我都相信勞小姐啲taste嘅，御苑依家個裝修都唔差嘅，如果keep住水準，應該唔會太差嘅!! 希望到時有驚喜啦，千祈唔好驚嚇就得嘞!! 佢地送嘅蛋糕我唔要，會唔會送返蛋糕coupon留返第時食或者upgrade第二啲地方。佢話無coupon送，因為蛋糕係佢地自己安排嘅，最多俾返多啲席前小食，都好啦!! 仲有，食齋點安排、酒店蜜月房........等等。喺御苑消磨咗都個幾鐘，都問咗好多問題、攞咗好多答案，已經解決咗我好多疑團
走咗之後，又諗起一啲新問題，唔緊要啦，我會繼續打電話問問題!! Banquet係最重要嘅一環，梗係要攪清楚啦!!
No comments:
Post a Comment